जापान
अगष्ट १४
जापानको क्युस्युमा स्थापीत व्यवसायीको पहिचान बनाउन सफल सुपेन्द्र घिसीङ्गले गैर आवासीय नेपाली संघ (एनआरएनए) अन्तराष्ट्रिय समन्वय परिषद्को आगामी कार्यकालका लागि युवा संयोजक पदमा उम्मेदवारी दिनु हुने भएको छ ।
आगामी ३० असोजदेखि ३ कात्तिकसम्म (१७–१९ अक्टोबर, २०२३) मा काठमाडौंमा हुने गैरआवासीय नेपाली संघको ११ औं विश्व सम्मेलन तथा अन्तराष्ट्रिय महाधिवेशनका लागि वर्तमान एनआरएनए आईसीसी सदस्य घिसीङ्गले उम्मेदवारी दिने घोषणा गर्नुभएको हो ।
विगत १६ वर्षदेखि जापानलाई आफ्नो कर्मभूमि बनाएर एनआरएनएको अभियानमा निरन्तर सक्रिय उहाँ नेपालको काभ्रेपलाञ्चोक जिल्लामा जन्मिनु भएको हो । घिसीङ्गको एनआरएनए अभियानमा २०१४ सालमा एनआरएनए जापान क्षेत्रीय समिति क्युस्युबाट गरी एनआरएनए जापान र हाल आईसीसी सदस्यमा रही सामाजीक कार्यमा सक्रिय हुनुहुन्छ ।
उहाँ काभ्रेली समाज जापान, तामाङ समाज जापान र जनजाति महासंघ जापानका विभिन्न पदको जिम्मेवारी वहन गर्दै अन्य विभिन्न संघसंस्थाको सल्लाहकारको भूमिकामा सामाजिक कार्य गर्दै आउनुभएको छ ।
नेपालमा २०७२ सालमा गएको महाभूकम्पमा आफूले आर्थिक सहयोग गर्नुको साथै आर्थिक संकलन अभियानमा समेत उहाँ सक्रिय हुनुभयो । कोभिड १९ मा पनि उहाँले नेपालको लागि र जापानमा रहेका नेपालीहरुलाई आर्थिक सहयोग र खाद्य सामग्री वितरणका साथै सूचना सम्प्रेषणमा समेत सक्रिय हुनुभयो । त्यसै बखत नेपालमा अक्सिजनको अभावमा भएको बेला अक्सिजन पुर्याउन महत्वपूर्ण भूमिका निर्वाह गर्नुभयो । नेपालमा दिनदुस्खी, अपांगता भएकाहरुलाई सहयोग गर्नुको साथै प्राकृतिक प्रकोप आदिमा निरन्तर सहयोग गर्दै आइरहनुभएको छ ।
उहाँको जापानमा घिसिङ कम्पनी लिमिटेडमार्फत ताज ब्रान्ड होटल व्यवसाय र GING लिमिटेड अन्तर्गत जापानमा मेनपावर र रियल स्टेट व्यवसाय गर्दै आइरहनुभएको छ ।
उहाँले विभिन्न देशमा छरिएर बसेका नेपाली युवाहहरुलाई स्वरोजगार बनाउने पहल, सामूहिक लगानी, सिप र पुँजीको सदुपयोग गर्दै एनआरएनएमा युवाहरुको आकर्षण बढाउने, सुरक्षित र मर्यादित वैदेशिक रोजगार बनाउन पहल गर्ने, एनआरएनए स्पोर्ट्स एकेडेमीलाई दीर्घकालीन योजनासहित स्थापित गराउने, उच्च शिक्षाको लागि विदेसिएका विद्यार्थीहरुलाई सही मार्गदर्शन दिने र दोस्रो पुस्तालाई एनआरएनएमा आबद्ध गराई नेपालसँग जोड़ने लगायतका प्रमुख उद्देश्य रहेको जानकारी गराउनुभयो ।
